Acts 15

Atukwoda Shaula Kmisunyi

1Esa nu Bulus n Barnaba yi ɓei fi Antakiya, azado ho ɓa kun n Yahudiya ɓa ɓe. Ɓai wu a Yesu viyi ge ndei ɓa ye gni-gni tile ɓa zhin ɓa kaciya, ɓa vi Musa owa njesun. 2Amma Bulus n Barnaba yi ɓa dna ɓedayi wye n naza hoi ngnisun. Har kwa ze ikklisiya Antakiya nya, ɓa tnu Bulus n Barnaba yi ɓa lo a tukwoda aba n Urushelima ntu wu-wu deye pya ɓo. 3Ikklisiya ku ɓa gnami ɓa kuka ɓa lo Urushelima, ɓa diya n Finishiya n Samariya yi ntu ge ɓa gye a Yesu viyi, ɓa da ɓa ngye shi abye do ga gaiciya lo n bai gbo-gbo.

4Shi ɓa ɓo ku si Urushelima, ɓa lo abyeda aba. Bulus n Barnaba yi, ɓa wu abyeda ngye shi Shekwoyi lo tnu-tnu lo n ɓai n abyedo aba. 5Amma Afarasiyi ho da lo ge, “Abyedo vinya nɓa ga gaiciya nyi, tile a zhin ɓa kaciya, ɓa vi Musa owa njesun.”

6Abyeda ɓa yi aje zhi ɓa gundo, ntu ge ɓa zhin shaula tu n ɓeda ho tukwo.

7Shi a ɓo la yezhi, Bitrus wa laka gni wa daɓo, aza yi ge, Omi azaje, fye kpe lo ge Shekwoyi ɓo la mi kni, ntu ge ma da nabari manayi abyedo aba, ntu ge ɓahin ɓa ga gaiciya. 8Shekwoyi n wo kpe aza bugba nyi, wo ɓo la tabata n kwoi lo ge wo ye abyedo lo, ntu ge wo ɓo la Zafun Gyi-gyi-yi ga ɓa, ngye shi wo ɓei ga yi nyi. 9Wo to n gna yi tu lo n eyi atan-tasin nɓa yi m ntu ge wo la ɓa bugba zhanya ntu ɓa gaiciya ga ɓo ngye yihin. 10Shekwoyi ɓei bwi aba nu, nfye ɓa dna wo n zokwo har fya tu abyedo a kaya n yihin kwo eyi azakwoyi to ɓei mi ya la n? 11Fye ta kpe lo ge gni-gni zhin kyauta nu, Dagayi Yesu Kristi nya, n aza ba n?

12Shi wo ɓo zo ɓeda, aza vinya ɓa ku ce pi, ɓa wo ngye shi Shekwoyi zhin aɓo wowoyi lo, n Bulus yi ɓedo n Barnabas yi n abyedo aba.

13Shi ɓa bo ku zo da Yakub wa daɓo n aza yi wa gna ge, “Omi azaje fye wo. 14Bitrus ku gna fye esa n Shekwoyi ɓo ya abyedo kni, ntu ge wa kni aza ɓa la owo ye tu. 15Anabi ɓei ku abyedo abuiye ɓo da, ko ku nu n yi esa. Wo nya nu anabi Amo ɓo da.

16“Dagayi ɓo gna ge, Avun deye, ‘Mia jezeɓe ntu ge ma ze omi alkawali a woi-woi n jesun n Dawuda yi.

17“ ‘Ntu ge abyedo ɓa kpe Dagayi ye, ɓa zan wo shi njesun.’ 18Dagayi kpe wo shiri vinya, Wo ɓa mi wa zhin aɓo ngye shi wo shiri nyi tunyi nkmisun-yi.

19“Ntu cenu enya ma gye kwonu nyi, yi to tu abyedo n ɓa ye abui nyi tile ge ɓa vi eyi a Yahudiyi awyidna m. 20Amma yi ɓa kage ɓa to gyi a shan abum, ɓa fa anagbai zhin, to ɓa gyi nya a to zun sha m. 21Ntu ge ala hana anya deye yi vinya, n a Yahudiyi aduwa nyakun n Satiwyi yi.”

22Ikklisiya atukwoda n Urushelima ɓa kni Yahuda n Sila yi, ntu ge ɓai gni lo n Bulus yi n Barnaba yi har Antakiya, ɓa lo ɓo da enya n na da.

23Wasika nyi n ɓa ɓei lo cei, Wasika ye gmi n yi aba nu, eyi atukwoda ɓedo ikklisiya yi n Urushelima. Kwoi ɓe fye a Yesu viyi aba n Antakiya, Suriya ɓedo n Silisiya yi, yi ɓi fye gna lo.

24Yi ku wo ge a Yesu viyi ho n la kunya ɓai gmi fye aɓo aje ge, tile fya shi Musa awyidna bwa, yi nu to tnu ɓa m. 25Yi ku shaula zhin ntu ce, Yi gna ge yi ɓa tnu n Yahuda, Sila, Bulus n Barnaba yi ɓa ɓe fya ba.

26– 27Yahuda n Sila yi ɓa ku ɓa wye-wyei ga ntu Kristi ɓo, Ɓa ɓa gna fye ngbei shaula n ya zhin. 28Kwa da Zafun Gyi-gyi-yi ɓedo n yihin, to ya tu fye tile ge fye zhin aɓo ngye a Yahudiyi m. 29Amma fye ɓa fa a shan nya gyi ɓo, n na nya yi n na to zun shan, to fya zhin anagbayi m. N fya zhin lonu ko la kun sai wyihoi.

30Aza ngun anyi ye ɓa kuka ɓa lo Antakiya, shi ɓa ɓo si ɓa ye a Yesu viyi zhi ɓa ga ɓa wasika. 31A Yesu viyi vinya ɓa dagma ɓai ci Shekwoyi, ntu ge wasika yi ɓei mi ɓa bugba gni.

32Sila n Yahuda yi, ɓa zhin waʼazi zhin-yi nu, ɓa zhin waʼazi ɓai mi a Yesu viyi gaiciya ga gni. 33Ɓa ɓo ku anyipyei bwa fyewyi n ɓai, ɓa kpe jeze lo Urushelima, ɓa lo ngna ɓi yi n atukwoda aba n Urushelima. 34Bulus n Barnaba yi, ɓa ku che fi n Antakiya anyipyei fyewyi. 35Ɓa ɓei bma amalami zhin ɓo, ɓahin ɓai zhin waʼazi, ɓai wu aza Shekwoyi ɓeda.

Bulus Ajegna N Barnaba Yi

36N wyihoi Bulus wa gna Barnaba ge, “Yi lo njesun yi gye aza n ɓa ɓo ga gaiciya nyi. Azhi gbo-gbo ya gye shi ɓa mwalo.” 37Barnaba wa ye, ama wa ye ge wa la Markus ɓa gni lo. 38Amma Bulus to ɓo ye ge, Yohanna Markus wa gnilo n ɓai m, ntu ge wo ɓo la jeze n Pamfiliya. 39Deye ɓo la Bulus n Barnabayi dna aɓona, n mwa har ɓa gnaje. Zaho-zaho wa lo wo nya nwo bwai. Barnabas wala Yohanna Markus ɓa lo Saipiris. 40Bulus wa kni Sila wa gni tnu-tnu zhin n woi. 41Ɓa lo Suriya n Silisiya yi ɓai mi ikklisiya zhi nbwai.